مفارقة الحلقة السببية - Causal Loop Paradox

الحلقة السببية بتحصل لما حدث ما يكون هو السبب بتاع حدث آخر والحدث الآخر ده برضه هو السبب في الحدث الأول

على سبيل المثال تخيل معايا انك قرأت رواية "البؤساء" لفيكتور هوجو وعجبتك جدا لدرجة انك قررت انك تاخد الرواية معاك وتروح لآلة زمن وترجع للماضي قبل ما فيكتور هوجو يكتب الرواية أصلا وقابلت فيكتور واديته الرواية وقولتله من فضلك خد انشر الرواية دي

دلوقتي السؤال اللي ممكن يؤدي لمفارقة هو "مين مؤلف الرواية؟" وهنا احنا قدام حلقة من الأحداث ملهاش نهاية احنا معانا شئ اسمه رواية البؤساء معندناش فكرة هي جت منين؟! فيكتور هوجو مكتبش الرواية هو أخدها منك انت لما رجعت بالزمن واديتهاله ونسختك المستقبلية هتقرأ الرواية اللي فيكتور نشرها وهترجع بالزمن علشان تديهاله وهكذا إلى ما لا نهاية

علشان كده المفارقة دي برضه اسمها "Ontological Paradox" او مفارقة وجودية لأنها بتخلينا مش عارفين الشئ ده بقى موجود ازاي أصلا لإن وجوده بحد ذاته هو جزء من أسباب وجوده

بمعنى اصح الحلقة السببية هي مفارقة بتنتج لما تيجي ترجع بالزمن وتكون سبب في الحاجة اللي في الآخر هتخليك ترجع بالزمن

مفارقة الحلقة السببية من المفارقات اللي في ناس كتير اختلفوا عليها في ناس مش شايفاها مفارقة ولا حاجة وأنها ممكن يتبص عليها بشكل منطقي وناس شايفين انها مفارقة فعلا وبتثبت ان السفر عبر الزمن مستحيل

علشان تفهم اكتر عن النوع ده من المفارقات الزمنية تحديدا ممكن ترجع تتفرج على فيلم Predestination أحداث الفيلم بتقوم على نفس الفكرة دي