مفارقة الجد - The Grandfather Paradox

الConsistency Paradox او مفارقة التماسك هي مفارقة بتنتج لما ترجع بالزمن وتغير شئ في الماضي يمنعك من السفر عبر الزمن في المستقبل المثال الأشهر زي ما قولت هو مفارقة الجد واللي هنفترض فيها انك رجعت بالزمن للماضي وقتلت جدك قبل ما يقابل جدتك فدلوقتي جدك مخلفش ابوك اللي بدوره مخلفكش انت كمان وبالتالي انت مش المفروض تكون موجود اصلا يبقى ازاي في المستقبل قدرت ترجع بالزمن وقتلت جدك؟!

والمفارقة دي ليها أسباب كتير وأنواع اكتر وكلهم بيطبقوا نفس المبدأ وبسبب حرية الإرادة للمسافرين عبر الزمن -اللي بتخليهم قادرين ياخدوا قرارات بعينها- ده خلى المشكلة معقدة أكتر وبقى فيه نسخة من الConsistency Paradox اسمها "Polchinski's Paradox" على اسم العالم اللي اقترحها بتستبدل الأشخاص اللي في مفارقة الجد بأشياء غير عاقلة

مفارقة بولشينسكي بتتخيل ان في كرة بلياردو ماشية في اتجاه معين ناحية بوابة زمنية والكرة دي لما بتكمل طريقها وبتدخل البوابة بترجع لنسختها في الماضي وتخبطها بحيث تغير مسارها في اتجاه تاني وبالتالي متدخلش البوابة ده معناه ان الكرة نفسها مدخلتش في البوابة الزمنية من الاول لكن زي ما شوفنا دخولها في البوابة الزمنية اتسبب في عدم دخولها البوابة الزمنية وده بيخلق مفارقة مستحيلة الحل

بسبب ان بعض حلول نظرية النسبية العامة بتسمح نظريا بالسفر عبر الزمن كانت المفارقة دي صداع في رأس الفيزيائيين وفي عالم روسي اقترح مبدأ واتسمى على اسمه "Novikov self-consistency principle" أو مبدأ نوفيكوف للتماسك الذاتي في المبدأ ده نوفيكوف بيقول ان السفر عبر الزمن نفسه مش مستحيل بس الشخص او الشئ اللي هيسافر عبر الزمن ميقدرش يغير أي حاجة ممكن تعمل مفارقة يعني في المثال بتاع مفارقة بولشينسكي احتمالية أن الكورة تدخل البوابة الزمنية وترجع في نفس اتجاه نسختها في الماضي علشان تخبطها وتغير مسارها لازم تكون صفر

يعني باختصار قوانين الفيزياء النظرية مش هتمنعك انك ترجع بالزمن لكن هتمنعك انك تعمل اي حاجه ممكن تؤدي لمفارقة

مبدأ نوفيكوف ده برضه تم تطبيقه في فيلم اسمه "The Time Machine" واللي البطل فيه بيحاول يرجع بالزمن علشان يمنع حدوث حاجة لكن دايما بيفشل